曼城一直计划同前锋艾宁夏兰特续约，根据西班牙《阿斯报》爆料，呢位23岁挪威国脚之所以仲未答应，因为等紧巴黎圣日耳门(PSG)射手基利安麦巴比去向，如果对方今夏加盟皇马，佢先至会选择同「蓝月亮」续约。

《阿斯报》指艾宁夏兰特同基利安麦巴比都系皇马嘅收购目标，2人亦有兴趣上「舰」，但系皇马近年财政欠佳，难以同时签入呢2位球星及负担其巨额薪酬，预料只能二选一。

由於基利安麦巴比将於今夏约满，好可能离开巴黎圣日耳门，比较大机会加盟皇马，所以艾宁夏兰特只能静观其变，一旦麦巴比上「舰」，意味自己转投皇马机会大减，到时再续约都未迟。

艾宁夏兰特仲有3年合约在身，根据合约条款，佢有权要求今夏转会，其他球会只要出2亿欧元(约17亿港元)就可以买断佢。曼城希望同夏兰特续约之後，可以废除解约条款。