车路士近期立立乱，有传安素费南迪斯、梅迪历、摩西斯卡些度等球星，後悔同球会签下超长期合约，安素更已率先要求转会。不过车路士喺英足盃赢阿士东维拉一仗，安素轰入精彩罚球後，就学美斯高举波衫庆祝，示意效忠车路士。

安素下半场射入靓罚球後，效法美斯喺2017年对皇马入波後，除波衫向球迷展示名字同号码经典一幕。安素随後更指住自己再指向地下，示意会留低喺车路士，反驳赛前传出佢要求离开车路士嘅传闻。

呢位23岁阿根廷国脚嘅经理人佩雷斯亦澄清：「安素冇打算离队，车路士嘅计划好清晰，一开头肯定困难重重，因为好多年轻球员啱啱加盟，当所有嘢都融合之後，车路士就会大幅进步。安素从来冇向车路士要求离队，当然我哋希望球队依家嘅位置唔系咁差，但透过努力最终都冇得到成功。」