周四(8日)凌晨英足盃第4圈重赛，车路士作客3比1击败阿士东维拉晋级，为饱受压力嘅普捷天奴暂松一口气。盛传面临炒鱿嘅普捷天奴，今场生死战意外踢走堤亚高施华，不过就否认同呢位中坚老婆早前公开要求佢下台嘅言论有关，真系信不信由你。

车路士喺联赛接连大败，传闻普捷天奴随时被炒，作客维拉成为生死战，点知今季中坚必然正选堤亚高施华突被贬後备。车路士亦踢出近期代表作，11分钟1次美妙组织由干拿加历查先拔头筹，10分钟後尼高拉斯积逊头槌顶成2比0，下半场安素费南迪斯轰入精彩罚球，虽然维拉喺补时破蛋，仍难阻车仔赢波晋级。

车路士上场输畀狼队後，堤亚高施华老婆Isabelle喺社交网公开要求炒普捷天奴，仲话唔尽快易帅就太迟，事後佢虽然公开道歉，但堤亚高施华仍被贬後备。普捷天奴赛後表示：「(唔用施华)点解要咁问？我系专业领队，拣人系睇表现同球队平衡，我明你嘅用意，但我要保持冷静，因为我要作出专业决定。」