国际迈亚密将於周三(7日)晚上6点喺日本出战神户胜利船，班主之一嘅碧咸原来并冇随队做「亲善大使」，而系飞去卡塔尔，睇周二(6日)晚举行嘅亚洲盃4强约旦对南韩，「万人迷」神情落莫，网民推测佢可能对於美斯喺香港「斋坐」一事遭受批评，仍然耿耿於怀，加上费事再做箭靶，宁愿去睇亚洲盃好过。

一向受万人景仰嘅碧咸，竟然喺香港大球场被4万人嘘爆，肯定毕生难忘，国际迈亚密嚟紧对神户胜利船，美斯能否上阵，仍然成为疑问，一旦再次失场，碧咸随时又要出来帮呢位阿根廷球王解围，咸哥今次学精咗，一於远离球队，去睇亚洲盃，以免再做箭靶。

另有传闻认为碧咸可能嬲咗美斯跣佢一镬，所以唔想跟随球队进行季前热身赛之旅，费事眼冤。相比之下，碧咸去到卡塔尔获得上宾招待，赛事社交网亦有介绍佢来睇波，但咸哥全程黑面，似乎仲未释怀。