车路士近20年属於「联合国球队」，因为前任班主阿布拉莫域及现时老板保利都不惜重金收购外援，本土球员难上位，但今季情况有变，2位新一代英格兰国脚干拿加历查、高尔彭马演出光芒四射，撑起车路士，今仗可以击败水晶宫，2人有好大功劳。

保利2年前入主车路士，大肆增兵，包括以过亿镑签入2位中场安素费南迪斯、摩西斯卡些度，但论表现，反而系上年夏天由曼城上「车」嘅高尔彭马最出色，呢位21岁新星今仗对水晶宫，补时贡献2次助攻，今季英超已经创造16个入球，包括射入10球及6次助攻，属於队内之冠，而且佢转会费仅4,000万镑(约4亿港元)，可以话系车仔近年性价比最高嘅收购。

至於干拿加历查更加系车仔青训产品，近年曾经被外借去查尔顿、史云斯、西布朗、水晶宫，上季重返母会後，开始获得重用，加上踢法全面，被誉为「新林柏特」。高尔彭马今仗有2次助攻，干拿加历查则梅开二度，标志球队土炮势力崛起，英格兰国家队亦成为受益者。