周六(17日)晚意甲，上季冠军拿玻里又失分，主场出击仅以1比1逼和热拿亚，已落後榜首国际米兰27分，好可能成为意甲史上最差衞冕球队，季中接手领军仅3个月嘅教练马沙利，恐怕随时被炒。

拿玻里上仗不敌AC米兰，今仗面对弱队热拿亚，亦占唔到甜头，如非门将阿历斯美列特屡救险球，恐怕一早已失守。换边後拿玻里都系顶唔住，热拿亚凭中场摩顿法兰度劲射入网打开纪录。

拿玻里失波後如梦初醒，倾力反击，踢到89分钟靠後备上阵前锋尼干治射入扳平1比1，勉强执番1分。

拿玻里近4场联赛仅1胜，排第9位，落後榜首国际米兰27分，意甲史上只曾出现4支衞冕球队，落後冠军20分或以上过终点，最大差距系1961/62年球季，衞冕嘅祖云达斯最终落後冠军AC米兰24分。以拿玻里今季颓势，可能会打破呢个「羞辱纪录」，但教练马沙利强调唔会主动辞职，似乎想博炒攞赔偿金。

另一场意甲亦爆出冷门，第2位祖云达斯作客只能逼和维罗纳2比2，连续4场联赛失分，落後国际米兰9分。