周日(18日)凌晨英超，阿仙奴作客5比0大胜般尼，继上轮6比0狂数韦斯咸後，连续2场联赛作客大胜并派11只蛋。英格兰右翼布卡约沙卡今场又有2个入波，近3仗录得5入球同1次助攻，系2024年欧洲5大联赛最弗球员。

阿仙奴近期火力全开，马田奥迪加特开波4分钟远射得手，完半场前李安度度沙特博到12码，沙卡操刀射成2比0，呢位英格兰翼锋47分钟近门狂轰再入多球，加上李安度度沙特同夏维斯亦分别建功，协助阿仙奴大胜5比0。

近日传出阿仙奴想签基利安麦巴比，亦有传媒比较话菲尔科顿更胜沙卡，令人怀疑种种传闻刺激沙卡爆发，阿迪达赛後回应：「我唔知道，呢条问题应该问沙卡。不过我认为佢唔需要受咩刺激，佢呢个年纪(22岁)嘅前锋、翼锋有咁稳定嘅数据，喺球坛上非常罕有，当你见到佢每日练习同自律，就唔会觉得奇怪，佢仲可以有更多进步。」