基利安麦巴比今夏自由身离开巴黎圣日耳门，似乎已成定局，下一站将加盟皇家马德里，不过双方仲需要一轮讨价还价，年薪几多系重点，今次转会，麦巴比向皇马开价年薪5,000万欧元(约4.2亿港元)，另加100%肖像权，但遭皇马否决。

对於麦巴比嚟讲，呢个价钱已经好大让步，因为佢喺巴黎圣日耳门年薪为7,200万欧元(约6亿港元)，「转会专家」罗曼诺报道，麦巴比已通知PSG唔会留队，双方未来几个月将会共同解决离队最终条款。

不过皇马方面唔希望麦巴比一人破坏球队薪酬架构，佢嘅年薪唔可以超过祖迪比宁咸同云尼斯奥斯祖利亚太多，上述两人年薪约为2,000万欧元(约1.68亿港元)，《马卡报》报道，皇马底牌系3,000万欧元(约2.5亿港元)，另加签字费，麦巴比想去皇马，要继续降低条件迁就。