高普宣布离开利物浦後，外间分析沙比阿朗素系接任顶头大热，不过近期拜仁慕尼黑经历联赛欧联2连败後，令事情出现变数，杜曹好大机会被炒，而沙比阿朗素同样系接任人选，2拣1之下，沙比仔会点拣？

《每日邮报》报道，沙比阿朗素正在规划自己嘅教练生涯，利物浦同拜仁都系佢感兴趣嘅球队，而且佢同利华古逊合约设有「离队条款」，列明佢3支前球队利物浦、拜仁或皇马如果提出斟介，利华古逊必须放人，现时利物浦同拜仁都极有机会启动此条款。

报道指，42岁嘅沙比阿朗素原打算再执教利华古逊至少1年，然後再考虑其他出路，但执教利物浦同拜仁嘅机会提早到来，令佢不得不重新规划未来。

对沙比仔嚟讲，利物浦来季肯定换帅，系佢转工好机会，但拜仁依家可能换帅换得仲快，一旦欧联出局，杜曹随时执包袱，或会立即提出斟介，令沙比仔提前思考未来。