巴塞隆拿中场法兰基迪庄前途问题又有新发展，根据西班牙《每日体育报》爆料，法甲豪门巴黎圣日耳门(PSG)计划今夏收购呢位26岁荷兰国脚，巴塞亦有两手准备，开始斟介拜仁慕尼黑「全能战士」艾方素戴维斯，补充兵源保持实力。

PSG早於5年前已经想签入法兰基迪庄，但被巴塞截胡，会方对呢位中场仍然念念不忘，加上考虑到射手基利安麦巴比好大机会今夏离队，需要收购具级数球星保持实力，所以再次向法兰基迪庄埋手，愿意开出6,000万欧元(约5亿港元)转会费。

巴塞因为陷入财困，早已计划出售法兰基迪庄，2年前几乎将佢卖畀曼联，但因为佢拒绝成「魔」，未能成事，PSG一向出手阔绰，并具备争夺欧联实力，或者可以吸引法兰基迪庄加盟。

另外，巴塞隆拿总监迪高近日同艾方素戴维斯嘅经理人见面，讨论签入呢位23岁加拿大国脚嘅可能性，可以胜任左闸及左翼嘅艾方素戴维斯将於明夏约满，拜仁为免人财两失，可能提早今夏出售佢，巴塞趁机抢人，据悉艾方素戴维斯要求1,200万欧元(约1亿港元)年薪及奖金，成为交易最大障碍。