拿玻里周四(22日)凌晨喺欧联16强首回合迎战巴塞隆拿，估唔到喺大战前48小时，呢支意甲冠军突然宣布易帅，辞退上任只有4个月嘅马沙利，斯洛伐克国家队主帅卡桑拿以「兼职」身份上任，并会闪电领军出战欧联。

拿玻里近况低迷，近5场赛事只得1胜，喺意甲跌到落第9位，上年10月接替鲁迪加西亚执教嘅马沙利，只系教咗17场波再被炒鱿，现时担任斯洛伐克国家队领队嘅意大利教练卡桑拿，已同拿玻里签约至季尾，以「兼职」身份执教。

55岁嘅卡桑拿曾2度喺拿玻里出任教练，先後跟过沙利同史巴列堤，2年前「单飞」执教斯洛伐克。拿玻里主席迪罗伦迪斯表示：「马沙利系我好朋友，同佢讲再见非常痛苦，但我亦系为拿玻里球迷考虑，依家就试下卡桑拿，佢同沙利、史巴列堤合作过，认识依家8成球员，我哋会尽力协助佢备战对巴塞隆拿呢场硬仗。」