周二(20日)凌晨英超护级大战，水晶宫作客爱华顿开波前宣布易帅，奥地利教头格拉斯拿取代因病住院嘅鹤臣执教。喺新帅入场观战下，水晶宫球员踢得落力，但喺比赛末段被爱华顿入波逼和1比1，目前以25分排尾6，爱华顿有20分列尾4，护级形势严峻。

水晶宫开波前4个钟宣布易帅，利云顿同柏德列麦卡菲今仗暂时领军，签约2年半嘅格拉斯拿亦有到场观战，上半场两队拉锯战，入肉埋门欠奉。踢到66分钟，水晶宫前锋佐敦阿休禁区外狂抽挂网，客队领先後全军退守，可惜完场前6分钟顶唔住，被阿马度奥拿拿接应角球顶入，两队1比1言和。

今仗暂代领军嘅柏德列麦卡菲赛後表示：「我未同格拉斯拿见面，宣布嗰阵我哋准备紧比赛。佢今场见到一支充满斗志嘅球队，喺爱华顿主场拎1分系正确方向，我相信佢会睇到好多积极嘅地方。格拉斯拿系欧洲冠军级教练，佢加盟对水晶宫系天大喜讯。」