德甲劲旅多蒙特喺冬季转会窗，由英超借用查顿辛祖同伊恩马特臣增强战力，虽然话题集中喺查顿辛祖，不过21岁左闸伊恩马特臣似乎获得更高评价。据报多蒙特如果要喺季尾买断其中一人，将会优先收购伊恩马特臣。

伊恩马特臣青训时代曾效力燕豪芬，转会车路士後未获重用，上月外借多蒙特後，6场联赛全部正选上阵，日前仲当选埋德甲1月最佳青年球员，风头更胜查顿辛祖。多蒙特门将基哥高保对佢亦有极高评价：「马特臣踢法好聪明，好肯攞波同寻求解决方法，佢嘅争胜心好强，非常出色。」

马特臣喺外借前同车路士续约，入面有3,500万欧元买断条款，报道指多蒙特非常有兴趣长留呢新星；至於另一借将查顿辛祖，预计曼联亦会要求3,500万欧元左右转会费，但多蒙特未必能够同时承担两单高价转会，如果只能2择其1，人工较平而表现更好嘅马特臣将系心水之选。