马德里体育会欧联16强大战国际米兰前，主力前锋艾华路莫拉达膝伤缺阵，不过教练施蒙尼就有神来之笔，上场联赛畀基沙文休息下，将中场通天佬官马高斯洛兰迪推上箭头，结果马高斯洛兰迪即入2球回应，随时成为欧联秘密武器！

马体会上场西甲对拉斯彭马斯，踢开右中场同右翼衞嘅马高斯洛兰迪，突然被安排做箭头，佢亦不负所托入2球兼当选赛事MVP。呢个调动曝光後，曾引起马体会名宿彭迪历质疑，结果证明施蒙尼决定正确，呢位阿根廷教头寸爆回应：「名宿系乜水？受到球迷爱戴嘅阿拉干利斯嗰啲，先至叫做马体会名宿。」

喺欧联会唔会再出任前锋？马高斯洛兰迪表示：「教练会决定点样踢最好，只要帮助到球队，任何位置都冇问题。作客国际米兰肯定好难踢，但我哋仲有时间准备，要以最佳状态出战。」