英超比赛竞争激烈，球场上经常出现火爆埋牙镜头，宾福特前锋马奥比最近就成为红人，先後同占士麦迪臣、基尔获加2位英格兰国脚爆冲突，日前又喺社交网公然「羞辱」前阿仙奴球星奥巴美扬，难怪被球迷选为英超「挑衅王」。

宾福特月初输畀热刺，马奥比因抄袭占士麦迪臣「掟飞镖」庆祝，同对方由场内驳火到场外；之後对曼城一战，呢位法国前锋又同基尔获加埋牙，基尔获加指控马奥比拎佢嘅仔女嚟讲。马奥比仲唔收口，早前参加宾福特TikTok游戏，要将10位球员排次序，当佢抽中奥巴美扬之後，竟然爆出一句：「可唔可以将佢排第11？」明显睇唔起该前英超金靴。

英国《太阳报》早前搞咗个英超史上「挑衅王」投票，马奥比就名列第2位，系仲喺英超踢波球员之中最高排名，击败阿仙奴门将兰斯达尔(第6位)同爱华顿门将比克福特(第10位)，而李斯特城传奇前锋占美华迪就得到第1位。