法甲名牌球会马赛近期立立乱，欧霸盃对萨克达前宣布易帅，加度素被炒鱿，上月非国盃被科特迪瓦炒鱿嘅加锡，成为马赛今季第4位教练。除此之外，马赛总监贝拿迪亚亦被法国球员工会指控「欺凌」球员，球会会长朗哥利亚就喺记者会拍枱反击。

马赛近7场不胜，上仗输波後，总监贝拿迪亚罕见公开狂插球员，直指阵中2至3个球员行为有问题，更开名指约拿芬卡拉奥斯系问题球员之一。法国球员工会随後发声明，批评前摩洛哥国脚贝拿迪亚咁做属於「欺凌」。

喺加锡上任记者会，会长朗哥利亚被问到呢件事，佢就发火拍枱反击：「我唔锺意佢哋嘅声明，个声明并唔认真，认真做法系要听各方面嘅说法。我打咗3次电话畀佢哋，佢哋都唔听，只系信晒单方面讲嘢。我哋请贝拿迪亚做总监系见到佢嘅能力，佢好有潜质。」