摩连奴今夏好大机会再战英超，不过唔系再度入主车路士或曼联，而系执教拥有沙特财团做後盾嘅纽卡素，据报佢已透过中间人向「喜鹊」开出条件，包括年薪1,500万欧元(约1.27亿港元)，最重要系有3亿欧元嘅组军预算(约25.4亿港元)。

好多人话61岁嘅「寸王」已经过气，但佢执教中型班罗马两季半，连续两年欧战打入决赛，展示领军能力，佢认为罗马喺联赛成绩唔好系因为班主唔识足球，又太孤寒唔肯花钱买人。

早前接受里奥费迪南访问，摩连奴已否定重掌曼联教鞭可能性，认为曼联高层唔肯按照佢心意组军，「寸王」打算重新建立球队，条件系班主拥有无限金钱，似乎纽卡素最适合佢。

《镜报》报道，摩dad已透过中间人向纽卡素开出条件，合约为期3年，年薪1,500万欧元，并提供3亿欧元组军资金，上述条件纽卡素都有能力满足，不过为避免违反财政公平法案，今夏势必大换血，出售捷比亚、哥林威尔逊、般奴古马雷斯等主力，畀摩连奴足够空间大展拳脚。