周日(25日)凌晨英超赛事，上周中欧联输波嘅阿仙奴，将一肚闷气喺纽卡素身上发泄，主场大胜4比1报番首循环枉输之仇。阿仙奴英超6连胜，而且更成为英超史上首支「连续7个半场」攻入至少2球嘅球队，火力相当惊人。

阿仙奴首循环作客纽卡素因VAR误判输0比1，今仗返主场非常积极，压住「喜鹊」狂攻，18分钟角球攻势逼到保治文摆乌龙，24分钟再靠一次美妙组织，夏维斯接应加比尔马天尼利传中近门射入，上半场领先2比0。

换边後继续进攻，布卡约沙卡65分钟个人表演右路抽入，4分钟後积及基奥柯又接应角球顶入，纽卡素尾段由祖尔韦洛克头槌破蛋，仍难阻阿仙奴大胜4比1。阿仙奴自2月初对利物浦下半场入2球开始，连续7个半场都攻入至少2球(见表)，创造英超新纪录。

阿仙奴领队阿迪达赛後表示：「纽卡素系支好高质嘅球队，但我哋仍然可以全场保持咁强嘅侵略性同质素，实在系非常乐见嘅现象，我睇得出球员嘅决心，主场球迷嘅打气亦系冇得顶，场内气氛令球队踢得更好，所以好多谢球迷嘅落力打气。」

阿仙奴近7个半场入球数字

VS利物浦下半场 2球

VS韦斯咸上半场 4球

VS韦斯咸下半场 2球

VS般尼上半场 2球

VS般尼下半场 3球

VS纽卡素上半场 2球

VS纽卡素下半场 2球