曼城喺英足盃16强大胜卢顿，但中场基亚利殊又受伤，呢位28岁英格兰国脚离场後，情绪崩溃落泪，似乎伤势唔轻。加上「蓝月亮」正选位置竞争激烈，令人怀疑呢位「1亿镑先生」能否继续喺球队立足。

基亚利殊2021年夏天以1亿镑(约10亿港元)转会费由阿士东维拉加盟曼城以来，一直被指踢唔出应有身价，今季更加频频受伤，令事业进一步走下坡，包括季初因为腿筋受伤缺阵6场比赛，上年12月出现腹股沟伤患问题，佢今场难得担任正选，但踢咗38分钟就伤出。

赛後曼城领队哥迪奥拿话：「我仲未同军医倾过，估计基亚利殊今次都系腹股沟受伤，佢原本感觉良好，但不幸又受伤，今季对佢而言，实在系举步维艰，希望佢早日康复。」基亚利殊今季英超仅上阵14次入3球，其左翼位置已逐渐被谢利美杜古取代，另一位新星奥斯卡波比亦冒起。

加上曼城已经预购阿根廷「新美斯」艾捷华利，佢将於明年1月正式来投，基罗纳翼锋沙维奥亦将於今夏加盟，曼城正选左翼之争一定愈来愈激烈，若然基亚利殊未能走出低谷，恐怕可能会被出售。