今晚英超进行补赛，「海鸥」白礼顿主场迎战车路士，双方上月尾交手打和1比1，不过当时伦敦劲旅车路士状态正陷低潮，并未反映真正实力，依家「车仔」表现已经复苏，预料今场作客都会主攻，而且近年联赛作客白礼顿都系早早领先，Mic少心水推介半场客胜。（Now 621周三凌晨4时直播）

呢场比赛原本安排喺2月9日周中举行，但由於车路士到时要以欧联冠军身份踢世冠盃，所以提早今晚进行。

「车仔」早前陷入小低谷，一度喺5场英超之中仅得1胜，包括主场同今场对手白礼顿踢成1比1，但要留意「车仔」该仗上半场已经领先，而且控制战局，势估唔到直至补时先畀「海鸥」逼和，失分的确有啲唔抵。之後嘅比赛车路士渐入佳境，包括喺英联盃4强两回合「双杀」热刺，晋级决赛大大振奋士气。美中不足系上轮英超遇上榜首曼城，最终以0比1仅败，为拉近与「蓝月亮」嘅积分差距，今仗「车仔」不容有失。

讲番上场斗曼城嘅排阵，车路士领队杜曹排出较为防守性嘅阵式，中场线用尼高路简迪及高华锡两名踢法实际嘅球员，两边亦用上防守意识较强嘅艾斯派古达及马高斯阿朗素。今仗对手唔同，相信「车仔」会踢得较为进取，换上基斯甸普列锡、佐真奴费路及美臣蒙特等，而且起用夏维斯代替上场表现甚曳嘅卢卡古，务求尽快取得入波。

虽然白礼顿近期频频抢到分，但要留意所赢嘅对手只系弱队宾福特，以及今季水准严重下滑嘅爱华顿，上轮主场斗水晶宫只能1比1握手言和，实力不宜高估。白礼顿目前位处联赛榜中游位置，想争入前列，夺取下届欧洲赛入场券，实在非常困难，同时「海鸥」亦冇护级压力，球员欠缺鲜明目标，战意不及要抢分争标嘅车路士，加上「车仔」近4次联赛作客白礼顿，全部喺上半场已经领先，一於捧半场客胜。