周五(21日)凌晨西盃16强赛事，皇家马德里作客艾尔切恶斗120分钟後，10人应战下凭艾斯高同夏萨特入波，戏剧性2比1反胜晋级，教练安察洛堤赛後大赞球队「有性格」，两位入球功臣下半季可望有更多上阵机会。

皇马今场收起宾施马等多位主力，作客未能撕破艾尔切嘅防线，90分钟踢成0比0平手。加时阶段高潮迭起，皇马左闸马些路喺102分钟侵犯对方单刀前锋被逐，艾尔切亦靠呢个罚球由干沙路华度射入。踢少个嘅皇马劣势下突然爆发，几位後备兵做好戏，108分钟丹尼施巴路斯射门省中艾斯高後改变方向入网，夏萨特就喺115分钟单刀扭过对方门将射入，带领皇马神奇反胜。

艾斯高同夏萨特都被皇马列为「清货」目标，呢球亦系夏萨特今季各项赛事第1个入球、艾斯高近4个月首个入球，安察洛堤赛後表示：「我好开心，呢场系今季令我最满意嘅比赛，球队展现出性格同永不放弃嘅精神。我特别为艾斯高同夏萨特开心，佢哋近期都冇乜上阵机会，但佢哋都做足准备，今场起到关键作用。」