阿仙奴喺英联盃4强出局，输波之余仲要折将，日前喺非国盃出局嘅汤马士柏迪，中午至先由非洲飞返伦敦，夜晚立即进入大军名单，并且喺最後16分钟上阵，点知佢喺完场前4分钟内连续拎2张黄牌被逐，周日(23日)对般尼嘅联赛要停赛，提早归队最终得个桔。

加纳喺非国盃分组赛意外出局，令汤马士柏迪可以提前返阿仙奴报到，期间连1场联赛都冇缺阵过，不过阿仙奴今场勉强凑够人数比赛，返国唔够半日嘅汤马士柏迪连时差都未适应到就要候命，最终都系「出事」，下场联赛可以安心休息。

阿仙奴上场联赛对热刺因唔够人踢而延期，领队阿迪达赛後透露今仗亦系仅仅够人，5至6个球员连赛前操练都冇就要即刻上阵。据报阿仙奴正喺转会市场积极增兵，前锋、中场同门将都系会增援嘅目标位置。