英国《每日邮报》爆料，指曼联中场保罗普巴同球会管理层开会之後，向对方表明自己已经决定今夏离队，并转投皇马，意味红魔鬼将会人财两失。

保罗普巴将於今夏约满，佢同球会一直未能就续约问题达成协议，据悉呢位28岁法国国脚近期同管理层开会，表明唔会再倾续约，因为佢已经决定以自由身转投皇马。

前祖云达斯中场马治斯奥喺社交网呼吁保罗普巴重返祖记，两人曾於2012至16年喺祖云达斯合作，加上教练阿里基已返回祖记执教，马治斯奥希望普巴返回呢支意甲劲旅「团聚」。不过普巴始终心系皇马，估计祖云达斯同巴黎圣日耳门都未能签入佢。

曼联2016年8月以8,900万镑向祖云达斯收购保罗普巴，但佢表现一直未如理想，上年11月受伤之後一直缺阵，近期已经复操，预料可於下月初复出上阵。

虽然保罗普巴无意留队，但看守领队兰历克早前透露，相信普巴为咗吸引其他球会签佢，今季余下时间将会落力演出，所以仍然会派佢参加比赛。