周六(22日)凌晨西甲，爱斯宾奴虽然先开纪录，但之後兵败如山倒，主场以1比4不敌贝迪斯。爱斯宾奴嘅中国球星武磊今场全程坐冷板，有统计指武磊今季冇上阵嘅西甲赛事，爱斯宾奴胜出率少一半，教练摩兰奴冇理由再雪藏呢位前锋。

开波14分钟，爱斯宾奴由鲁尔杜马斯近门射入，贝迪斯获得12码，保查艾利斯亚斯主射入网扳平，之後好快由古度洛迪古斯顶入，贝迪斯上半场已经反超前2比1。

换边之後，保查艾利斯亚斯再建一功，加上韦利安荷西射入，协助贝迪斯大胜4比1。

爱斯宾奴落後之下，并冇派出武磊上阵，佢今季12场有份上阵嘅联赛，爱斯宾奴取得5胜4和3负，胜出率有41.7%，当中更击败皇马。反观，武磊有9场西甲全程做後备，爱斯宾奴只取得2胜2和5负，胜出率只有22.2%，唔好睇小武磊对球队嘅重要性。