球坛唔少球员都系虎年出生，今年好多24岁，事业及状态都处於高峰，正值虎跃龙腾，亦有唔少即使36岁，场上表现仍然虎虎生威。呢批球星嚟紧除咗协助所属球队於联赛力争佳绩，唔少仲有机会出席冬天举行嘅世盃决赛周，与列强展开龙争虎斗。

耶坚等行大运

「虎帅」耶坚上年8月接任瑞士国家队领队之位，立即面临大考验，领军冲刺夺取世盃决赛周入场券，呢位47岁少帅虽然之前大部分时间仅执教瑞士本土球队，但去到国际赛舞台一样有料到，两战欧国盃冠军意大利，都力保不败，包括次循环作客，避过被绝杀，最後更加力压意大利，取得首名直接出线资格。耶坚有实力又有运行，加上今届世盃决赛周喺虎年举行，相信佢应该有一番作为。

纽亚宝刀未老

已经35岁嘅纽亚宝刀未老，仍然系球会同德国国家队嘅必然正选，公认嘅世界最佳门将之一。据报拜仁慕尼黑已经决定同佢续约到2025年，意味纽亚至少会踢到39岁！虎年纽亚继续向住各大锦标进发，除咗德甲同欧联冠军之外，卡塔尔举行嘅世盃决赛周亦系纽亚主要目标，今届赛事有可能系佢最後一次出战世盃，当然希望喺「本命年」再尝捧盃美梦。

富安健洋大展身手

日本球员近年喺欧洲球坛愈嚟愈吃香，富安健洋就系英超人气球员之一，佢上年由博洛尼亚转投阿仙奴後，立即成为球队右闸不二之选，出色表现更被誉为英超其中一位最佳右闸，表现超乎预期。只有23岁嘅富安健洋喺日本国家队系正选中坚，球队依家正争逐世盃决赛周入场券，如果日本顺利晋级，呢位「东瀛之虎」有望喺世界舞台大展身手。

沙治奥拉莫斯重现风采

上年系沙治奥拉莫斯足球生涯出现重大变化嘅一年，效力皇家马德里16年嘅佢毅然转战法甲，加盟另一班霸巴黎圣日耳门。沙治奥拉莫斯嘅法国生涯开始得麻麻，长期养伤之後亦未拎到正选位置，不过近期开始有起色，上场联赛就攻入佢转会後第1个入球，重现球坛最强「带刀侍衞」嘅风采。巴黎圣日耳门虎年最大目标系欧联冠军，沙治奥拉莫斯嘅丰富经验会系球队宝贵财产。

祖利斯古迪大放光芒

呢位法国中坚上年行运一条龙，入选国家队兼且有份出战欧国盃决赛周，佢喺西甲嘅表现同样大获好评，成为车路士领队杜曹嘅头号猎物。据报「蓝战士」已经同西维尔差唔多倾掂，今个夏天会用6,000万欧元转会费收购祖利斯古迪，将呢位年轻中坚打造成球队防线核心，祖利斯古迪体能、速度同头槌都唔差，绝对有能力适应英超体力化踢法，虎年有望大放光芒。

阿历山大阿诺特鸿运当头

阿历山大阿诺特於牛年确系几黑仔，临欧国盃开打前因伤退队，错过英格兰历史性杀入决赛嘅重要时刻，早前更确诊新冠肺炎。不过阿诺特明显摆脱上季嘅小低潮，单计英超，佢保持出击力强风格，今季已贡献10次助攻，位居助攻榜榜首，以右翼衞身份非常难得，而且防守亦少咗甩漏，啱啱协助利物浦杀入英联盃决赛，佢上年亦同红军续约，更扬言宁愿挂靴都唔叛投死敌曼联，咁忠心虎年随时「红」运当头。

马田奥迪加特虎王发威

2015年以15岁之龄入选挪威嘅马田奥迪加特，上年更荣升队长，虽然佢年少成名，但多年来都畀皇马当人球咁不断外借，不受重用。直至上季季中被借到阿仙奴，表现不俗，更获呢支英超球队正式提出收购，佢感受到尊重嘅同时，亦想结束人球生涯，因此毅然加盟兵工厂，更以中场核心身份，屡有入波及助攻，终於可尽展所长，加上挪威无缘今年世盃，「虎王」必定喺「本命年」全力为阿仙奴抢下届欧联入场券。

文路尔卢卡迪利声价十倍

「猛虎」文路尔卢卡迪利原本寂寂无闻，上年欧国盃初段趁住马高华拉堤受伤，先喺分组赛对瑞士梅开二度，再於16强对奥地利後备入替，帮意大利抢番中场优势，协助球队於加时赢波，最终「蓝衣兵团」事隔53年再夺欧国盃。卢卡迪利亦一登龙门，从萨斯索罗转投班霸祖云达斯，并逐渐抢到正选席位，卢卡迪利打法全面，抢截及後上埋门都好耍家，嚟紧意大利要出战世盃附加赛，佢嘅表现绝对系举足轻重。

基斯甸普列锡年少成名

「美洲虎」基斯甸普列锡年少成名，依家已贵为美国国家队队长，不过佢牛年运程都几反覆，状态好嗰阵，成为首位於欧联决赛上阵嘅美国球员，并3度当选美国年度最佳球员，可惜佢不断受伤患困扰，更因确诊新冠肺炎而抖咗一排，影响状态，令佢始终未能喺车仔奠定正选位置，非常黑仔，最弊系薛耶治、赫臣奥杜尔、美臣蒙特都愈来愈弗，「美国队长」要争位绝对唔易。

拿尼飞虎驾到

边路「飞虎」拿尼经过3年美职生涯之後，今年1月重返欧洲球坛，加盟意甲球队威尼斯。呢位35岁葡萄牙翼锋首场披甲，就贡献助攻帮威尼斯逼和安玻里，证明同「师兄」C朗一样，即使一把年纪，仍然可以保持良好身体质素。不过，拿尼喺虎年条路应该唔易行，因为威尼斯已经9场联赛未赢过，深受降班威胁，由於拿尼同威尼斯签约1年半，一旦球队不幸降班，佢下季就要踢意乙。

法卡奥龙精虎猛

绰号「老虎」嘅法卡奥真系属虎，曾经系入球机器，但效力曼联同车路士期间变成「病猫」，後来去土耳其搵食，几乎被球迷遗忘。不过法卡奥胜在够韧力，今季再战西甲证明自己宝刀未老，踢13场联赛有5球进帐，包括对巴塞隆拿，射入全场唯一入球，令对手教练朗奴高文被炒。身为射手嘅法卡奥拣着後衞球员嘅3号波衫，因为要向亡父致敬，佢爸爸球员时代司职後衞及着3号，法卡奥咁孝顺，自然获得眷顾。

基利安麦巴比平步青云

「老虎仔」基利安麦巴比上年经历大起大落，喺欧国盃16强互射12码宴客，成为法国出局嘅罪人，但3个半月之後，却喺欧国联决赛射入致胜1球，协助法国夺冠。PSG两位球星美斯、尼马今季状态欠佳情况下，麦巴比撑起球队，轰入10个联赛入球，尽显大将之风。呢位射手将於今夏约满，好大机会转投皇马，行偶像C朗球王之路。西甲崇尚进攻风格，更有利麦巴比发挥，佢嘅事业应该可以喺虎年更上一层楼。

国际球坛虎踪处处

「虎」被朝鲜民族视为神兽，南韩又有官方称呼为朝鲜虎或太极虎，南韩嘅队徽就有个虎头形象，另一设计系「猛虎弄球」，南韩国家队实力属亚洲顶尖，由1986年开始保持连续9次出席世盃决赛周，嚟紧2022卡塔尔世盃亦已经肯定出线，嚟紧将会系佢哋连续10次出席世盃。

至於韩职球会当中，有猛虎形象嘅系蔚山现代，其队徽系一个虎头，球会其中一个绰号就系「老虎」，另一个绰号为「铁槌」，球会1983年成立，曾两夺韩职冠军，以及两夺亚冠盃冠军。

侯城

英格兰约克郡东部球会，曾角逐英超，现於英冠联赛角逐。球会成立於1904年，由於其主场球衣为黄黑直间，外观酷似老虎，故有「老虎」称号。会方亦曾希望将队名称为「侯城老虎」，但不获足总批准及球迷支持，故继续称作侯城，不过有一份非官方刊物则自称为「侯城老虎」。

堤格雷斯

墨超球会堤格雷斯英文名Tigres，法文就系老虎嘅意思，全名「新莱昂自治大学老虎足球会」，简称「老虎队」，主场为圣尼古拉斯市大学体育场，球会成立於1960年，曾7次称霸墨超，国内盃赛3次封王，2020年中北美洲冠军盃冠军，去年初打入世界冠军球会盃决赛，对拜仁慕尼黑仅输0比1得亚军，可见该队实力不弱。