西班牙本土射手鲁尔杜马斯，今季喺西甲射手榜高踞前列，表现令人关注。呢位爱斯宾奴主力前锋，喜爱将自己名字嘅首个英文字母「R.D.T」，印喺球衣背部，做法非常特别，近日他就於访问中透露点解会有咁嘅谂法，仲不忘分享自己对队友武磊嘅睇法。

今季西甲征途已经过半，射手榜争夺仍然激烈，除了皇马射手宾施马高踞榜首之外，爱斯宾奴当家射手鲁尔杜马斯亦继续保持近季好脚风，成为呢支加泰隆尼亚球队嘅抢分功臣，鲁尔杜马斯仲凭住出色表现，早前首次入选西班牙国家队做「大国脚」。

比起唔少球员将自己名字完整印喺波衫上，鲁尔杜马斯每次落场，波衫背部都会只会印上「R.D.T」，对此佢解释道：「呢个系我同个人健身教练一齐谂出嚟，佢话如果我印晒自己全名，就一定唔会买我件波衫，相反印『RDT』，佢就会有兴趣买，结果我接纳咗佢嘅意见。」

爱斯宾奴阵中，仲有位中国队友武磊在阵，鲁尔杜马斯亦讲到自己对佢嘅睇法： 「武磊系一位好醒目嘅球员，考虑到佢以前踢波嘅地方，同西班牙踢法有啲唔同，加上言语上嘅隔阂，对佢嚟讲肯定唔容易；但武磊已经适应到西班牙足球。」鲁尔杜马斯仲话自己同武磊合作得好愉快：「武磊喺场上嘅走动系好特别，可以入波同助攻，好开心可以同佢一起踢波。」