周日(27日)凌晨德甲赛事，拜仁慕尼黑作客以1比0险胜法兰克福，喺德国领先踢少1场嘅多蒙特9分。日前表示唔会喺世盃外附加赛同俄罗斯比赛嘅罗拔利云度夫斯基，今场戴上黄蓝色队长臂章，继续声援乌克兰。

拜仁慕尼黑今场完全压制主队，达到65.7%嘅争波成功率更系德甲今季最高纪录，全场有多达22次射门，不过面对法兰克福全力防守仍然非常吃力，最後要去到71分钟，先至由後备上阵嘅利莱辛尼中路突破越位射入，协助拜仁慕尼黑小胜1比0。

罗拔利云度夫斯基今场表现机会唔多，上半场一次头槌攻门斜出最有威胁，虽然佢今场5次射门3中目标但冇波入，但呢位波兰前锋赛後话：「球队今场防守好好，控制晒比赛，唔系场场都可以入4、5球，尤其法兰克福系支好难应付嘅球队。」