美职队伍侯斯顿戴拿模周四（3日）宣布，与现效力马体会嘅赫达靴里拉达成协议，今夏呢位墨西哥国家队队长将正式来投，登陆美职联！

侯斯顿戴拿模宣布，已经同31岁嘅赫达靴里拉签署预备合同，合同由今年夏天到2024年，仲有权延长到2025年。呢位墨西哥中场球员喺墨超帕丘卡出道，效力过葡超波图。2019年转投马德里体育会，成为上季西甲冠军成员之一，今季佢各项赛事上阵过20场。

侯斯顿戴拿模行政总裁柏安斯特对签下靴里拉感相当兴奋：「呢一宗系我哋球会史上最伟大嘅转会！」领队保罗永村亦指：「你只需要睇吓佢过去10年嘅资历！佢踢过欧联，兼系墨西哥队长，无疑系球队嘅重要收购。」