西甲劲旅马德里体育会近期成绩重返正轨，上轮联赛击败贝迪斯後杀入前4名，当中祖奥菲历斯嘅爆发系重要原因，呢位葡萄牙球星近4场比赛有4个入波，对贝迪斯一仗除梅开二度外，仲有一个近50码外抽入嘅「年度金球」惨食诈胡。不过祖奥菲历斯仍然信心十足，表明马体会已经回复劲旅本色。

祖奥菲历斯喺对贝迪斯後表示：「好开心见到球队踢得非常集中，只要继续踢出呢种水平，马体会嘅竞争力会好强大。」对於自己近期状态，呢位22岁球星表示：「我习惯将事情做到最好，但有时入球总入擦身而过，依家我脚风顺，希望可以一直保持。」

马体会教练施蒙尼就话，祖奥菲历斯应该好憎佢：「佢好嬲我，而且仲会继续咁嬲我，不过总有一日佢会多谢我。佢依家嘅表现就系我一直要求佢做嘅嘢，入球、视野、速度、过人、防守，佢依家全部都做得好好。」马德里体育会今个星期会喺西甲主场迎战卡迪斯，下周中就会喺欧联16强次回合作客曼联，两队首回合踢成1比1平手，当时为马体会先开纪录嘅就系祖奥菲历斯。