巴塞隆拿经过冬季增兵之後，成绩有明显改善，但同时出现人满之患，对於原本财力不足嘅巴塞而言，无疑系百上加斤，西班牙传媒指巴塞计划今夏大清货，出售部分副选，前锋巴夫韦迪、中坚基文迪朗格勒最大机会离队。

30岁嘅巴夫韦迪原本季初表现唔错，但不幸膝部受伤，缺阵一段长时间，加上主帅沙维签入奥巴美扬、费伦托利斯、艾达马查奥尔之後，巴夫韦迪已经唔喺佢计划之内，就算留队都难有上阵机会。呢位丹麦国脚将於2024年夏天约满，佢希望提早今夏走人，可能转投基达菲等西甲中小型球会。

至於中坚基文迪朗格勒4年前由西维尔加盟巴塞隆拿，近2年状态下滑，现时已经沦为第4中坚，上阵次序排喺碧基、朗奴阿拿奥祖、艾利加西亚之後，今季各项赛事16次上阵加埋只系踢咗790分钟，加上巴塞准备签入车路士中坚安达斯基斯坦臣，基文迪朗格勒更加冇生存空间。

不过，基文迪朗格勒毕竟只系26岁，加上系法国国脚，仍然获得唔少大球会垂青，阿仙奴、热刺都有意签入基文迪朗格勒。