正当世界各地球员声讨俄罗斯入侵乌克兰之际，身为国家队上阵次数最多嘅乌克兰前队长泰摩斯卓克就一直无作出公开声明，而佢嘅沉默或面临後果，乌克兰足总正计划褫夺佢喺国内嘅所有荣誉，更打算吊销佢嘅教练牌照。

为谴责俄罗斯对乌克兰采取军事行动，就连拜仁前锋罗拔利云度夫斯基早前亦发表声明，但现担任俄超班霸辛尼特助教嘅42岁前乌克兰国脚，泰摩斯卓克反而一直无动於衷。

据西方传媒报道，乌克兰足总道德委员会，正计划褫夺泰摩斯卓克喺国内嘅一切荣誉，包括吊销佢嘅教练牌照、禁止佢喺乌克兰从事足球活动、剥夺佢喺国内比赛赢过嘅所有奖牌，更从国家队名册中将佢嘅纪录剔除。

「自俄罗斯侵略乌克兰後，泰摩斯卓克冇发出任何公开声明，仲未同侵略者所属嘅球会划清界线。当佢嘅前球会拜仁慕尼黑呼吁支持乌克兰时，泰摩斯卓克依然保持缄默。」乌足总道德委员会喺声明中提到。

泰摩斯卓克球员时代司职防守中场，为萨克达赢过乌超、乌克兰盃等冠军，其後两度效力辛尼特，2009至2013年效力拜仁慕尼黑期间，赢过德甲同欧联冠军，并於2016年退役。泰摩斯卓克曾获得144顶喼帽，系乌克兰国家队上阵次数最多嘅球员，并出战过2006年世盃、2012及2016年欧国盃决赛周等大赛。