巴塞隆拿近期势如破竹，周一(14日)凌晨西甲主场4比0大炒奥沙辛拿，状态大勇嘅奥巴美扬又有「士哥」，佢加盟唔够2个月已经成为队中次席射手，难怪加泰罗尼亚媒体都提出质疑：巴塞隆拿仲使唔使抢艾宁夏兰特？

巴塞隆拿今场入局快，加维14分钟博到12码，由费伦托利斯操刀射手，呢位前锋7分钟後再接应奥士文尼迪比利妙传射成2比0；27分钟轮到奥巴美扬发威，佢接应奥士文尼迪比利传中近门笃入。巴塞75分钟再由後备上阵嘅列基佩治埋斋，轻微大炒4比0。

奥巴美扬1月加盟後，喺6场联赛攻入5球，今季入波仅次於迪比成为2号射手，巴塞对上一次有球员喺头6场西甲入5球，已经要数到2009年嘅伊巴谦莫域。西班牙《每日体育报》赛後发表文章，指巴塞唔需要为艾宁夏兰特尽地一煲，如果佢肯加盟当然理想，但如果呢位挪威射手另有计划，巴塞仍然有值得信赖嘅奥巴美扬。