祖云达斯1月签入神射手杜辛华荷域後，由马德里体育会借用嘅艾华路莫拉达被睇死冇碇企，不过教练阿里基将佢改造成左翼，效果相当唔错，据报祖云达斯正考虑启动合约中嘅买断条款，用4,500万欧元将佢收归旗下。

艾华路莫拉达向来踢箭头位置，但系把握力就备受批评，自杜辛华荷域加盟後，艾华路莫拉达就被移去「三叉戟」嘅左边，同杜辛华荷域、保罗戴巴拿合作良好，今季意甲已有11次助攻，创造机会次数亦系意甲前锋之冠，呢位西班牙国脚日前表明：「我唯一嘅要求系踢攻击位置，踢边都冇问题，祖云达斯系世界顶尖球会，我好荣幸可以为佢哋效力。」

祖云达斯喺2020年向马体会借用艾华路莫拉达2年，借用费为1,000万欧元，合约中亦有4,500万欧元买断条款，阿里基日前大赞佢系「世界最佳前锋之一」，意大利媒体指祖记启动买断条款系事在必行。