巴黎圣日耳门欧联16强出局，两大巨星尼马同美斯返到联赛齐被球迷喝倒采，「大巴黎」对此事反应两极，高层正尽力安抚美斯，畀时间佢提升状态，但对尼马就彻底失望，已放出消息今夏将佢出售，但无人问津，甚至其原属球会巴塞隆拿亦拒绝回收。

西班牙电视6台报道，圣日耳门发放出售尼马消息之後，仲曾经联络巴塞隆拿，询问巴塞有冇兴趣回收呢位巴西王牌，已遭巴塞拒绝。其实大家都唔系傻，尼马近年表现大不如前，成日拣波踢，人工又高，想搵买家唔系咁易。

尼马於2017年以2.22亿欧元由巴塞转投圣日耳门，创下世界最高身价纪录，佢同圣日耳门合约到2025年，年薪高达3000万欧元，不过球圈好现实，尼马水准大跌，今季上阵20场仅入5球，再唔系咩巨星，圣日耳门作为欧洲豪门，想踢佢走都好合理。

对於美斯，圣日耳门高层仍有足够耐心，希望佢喺法甲寻回最佳状态，近日有消息传出美斯有意重返巴塞，圣日耳门尽力安抚，稳住美斯情绪，同佢哋对待尼马嘅态度有明显分别。