奥巴美扬自冬季转会窗加盟巴塞隆拿後，表现脱胎换骨，过去7场比赛攻入7球，成为球队复苏嘅重要原因。呢位加蓬射手嚟到西甲如鱼得水，近日更打造一条「巴塞Style」钻石颈链嚟奖励自己，并自揭突然爆发嘅最大原因──开心！

奥巴美扬上半季喺阿仙奴表现低沉，不断失机之余仲出现纪律问题，最终被放入雪柜并喺冬天离队，但转投巴塞隆拿後立即翻生，奥巴美扬表示：「可以点解释呢？我一直努力练习，我谂最重要嘅系觉得开心，当一个人开心，对所有事都会感到兴奋，无论系入波或者帮助球队。」

呢位32岁前锋喺巴塞隆拿明显过得「开心」，近日更搵嚟着名珠宝设计师Abtin Abassi，为佢特别打造一条「A」字钻石颈链，而且颜色仲有「巴塞Style」嘅红、蓝、黄、绿色，似乎已经100%投入巴塞隆拿嘅生活。