周一(21日)凌晨西甲国家打吡出现惊人赛果，近况大勇嘅巴塞隆拿作客4比0大炒「1哥」皇家马德里，虽然踢少1场下仍落後12分，但巴塞後上气势相当凌厉，教练沙维更成为史上首个以球员同主帅身份，喺巴拿贝球场炒皇马4球嘅人，创造历史。

巴塞近年畀皇马食住，对上一次国家打吡赢波已经系3年前，不过今仗就踢出水银泻地嘅进攻，全场18次攻门有10次命中。首次出战国家打吡嘅奥巴美扬光芒四射，29分钟接应奥士文尼迪比利传中顶入先开纪录，38分钟再由朗奴阿拿奥祖角球顶成2比0。

换边後巴塞继续抢攻，47分钟奥巴美扬前场逼抢成功，交畀费伦托利斯射入；4分钟後2人互换角色，费伦托利斯助攻奥巴美扬射入，率领巴塞大胜4比0完场。巴塞近10场联赛拎到8胜2和成绩，下轮只要主场赢埋西维尔就可以升上第2位。

巴塞完美复活，季中上任嘅教练沙维居功至伟，今仗系佢执教生涯首场国家打吡，立即拎到4比0大胜，球员时代嘅沙维亦曾喺2009年，带领巴塞作客6比2大破皇马，令佢成为首个以球员同教练身份作客赢皇马4球嘅人。

有趣嘅系，09年嘅6比2经典亦系哥迪奥拿执教巴塞後首次作客皇马，沙维有望重演哥帅嘅成功之路。沙维赛後表示：「我觉得好光荣，巴塞近年喺国家打吡唔系好成功，今次欢乐系球迷应得。巴塞今场表现唔系完美，但都非常神奇，我哋已经向全世界发出讯息，巴塞复活啦！」