皇马前锋宾施马因伤缺阵上仗西甲「国家打吡」对巴塞隆拿，睇住球队惨败0比4，呢位34岁法国射手为咗早日复出帮助球队争标，用尽各种方法治疗伤势，包括接受拔火罐。

宾施马喺社交网上载一张拔火罐之後嘅相片，见佢背部及後脑位置都有拔火罐嘅红印。呢位前锋又展示自己喺健身室操练嘅情况，睇来状态唔错，伤势应该已经恢复得七七八八。

宾施马今季为皇马各项赛事上阵34场，射入32球及13次助攻，成为「银河舰队」进攻灵魂人物，教练安察洛堤等紧佢救亡，目标系希望呢位射手可以赶及4月7日凌晨复出，踢欧联8强首回合作客车路士。