英冠球队打比郡今季因财困被赛会扣减达21分，目前正陷入水深火热之中。不过佢哋日前收到惊喜嘅消息，荷里活影星佐治古尼打算筹组财团收购呢支英冠球队，令一众球迷都非常振奋。

60岁嘅美国演员及监制佐治古尼，曾参与《盗海豪情》得着名电影，近年佢仲捞过界，想加入足球班主行列。据报道指，佐治古尼2016年同英国演员Jack O'Connell合作嘅时候，被佢影响而深深爱上咗足球，而喺两年前更被邀请加入收购西甲球队马拉加嘅财团，虽然最终失败，但并冇令佢放弃做球队班主嘅目标。

日前，佐治古尼接受英国一本杂志访问时透露，自己有意收购打比郡：「打比郡系一支拥有美妙历史嘅伟大球队，我好肯定佢哋会有一个美好嘅将来。我知道佢哋目前正面对一啲困难，但球队依家正努力克服，冇问题系唔能够解决。」

打比郡因唔合乎赛会嘅财政要求，季初已被扣减21分，但凭着朗尼嘅出色领军能力，目前以25分排喺榜尾，护级仍然仲有机。

佐治古尼并唔系首位对成为英格兰联赛球队班主有兴趣嘅荷里活影星，饰演电影角色死侍嘅赖恩雷诺士2020年就同麦艾亨尼，收购咗域斯咸，成为呢支英格兰全国联赛球队嘅班主。