由於俄乌战事爆发，两国联赛都被逼暂停，国际足协(FIFA)同欧洲足协(UEFA)早前宣布，会开启「特别转会窗」，容许两国球员依家转会去其他球队效力，英超护级份子般尼就倾掂借用莫斯科斯巴达嘅域陀摩西斯，可惜被英超赛会拒绝，令交易告吹。

31岁嘅域陀摩西斯2年前转战俄超，随住联赛因战火暂停，般尼就想借用佢至今季季尾，据报2间球会以及球员都已经同意，但英国《每日邮报》报道，英超赛会已拒绝通过呢单转会，因为英超并无意跟随FIFA同UEFA嘅新措施，以确保比赛嘅公平。

事实上，FIFA同UEFA嘅新措施未获支持，意甲同德甲都拒绝球会喺夏季转会窗展开前签人，只有西甲跟随新指引。