乌拉圭前锋卡云尼今季喺曼联未受重用，今个夏天离队势在必行，据西班牙传媒报道，呢位老将正同西甲劲旅皇家苏斯达斟介，下季有望回归西甲。乌拉圭名宿科兰就表示，曼联今季唔用卡云尼系「走宝」。

35岁嘅卡云尼原本属意返南美洲落班，阿甲劲旅河床亦提出斟介，不过重返西甲对卡云尼嚟讲仍有吸引力，消息指皇家苏斯达已经同卡云尼代表进行接洽，可以留喺欧洲最高水平联赛，亦系卡云尼证明自己宝刀未老嘅好机会。

前曼联球星科兰亦为同乡出头：「我觉得如果曼联今季畀多啲机会卡云尼，佢会有好多重要入球，如果大家仲记得，卡云尼上季一直做紧呢样嘢(入波)，成支球队都好支持佢，但我唔知今季有乜原因令佢冇得踢，但当你踢2、3场就坐冷板，好难会有稳定表现。」