虎父无犬子，唔少球坛「星二代」都具备优厚潜质，皇马左闸马些路嘅囝囝安素日前协助皇马U12，夺得由西甲赛会举办嘅「国际盃」冠军，安素喺分组赛对利物浦，射入精彩入球之後，扮C朗庆祝，话唔定将来会成为皇马7号主人。

呢项赛事有多支欧洲大球会嘅青年军参加，包括皇马、巴塞隆拿、马体会、西维尔、利物浦、祖云达斯、多蒙特、宾菲加等。

皇马同利物浦同组，身穿皇马9号嘅安素同爸爸马些路一样，都系爆炸头，唯一唔同系安素司职前锋，老窦踢後衞，可能两父子平时经常交手，12岁嘅安素实力远胜同龄球员，佢喺对利物浦一役，摆脱对手2人夹击，冷静射入，充满射手触觉。

最搞笑系安素入波之後，做出C朗招牌跳起转身庆祝动作，似乎佢嘅偶像系呢位葡萄牙球星，而唔系爸爸马些路。

皇马喺呢项赛事表现超班，4强以1比0击败西维尔，决赛遇上宿敌巴塞，并凭华伦天射入精彩罚球，以1比0击败巴塞，夺得冠军。