皇马教练安察洛堤早前确诊新冠肺炎，缺席上场西甲领军对切尔达，呢位意大利名帅嘅病情反覆，周一(4日)并未有现身指挥球队操练，西班牙传媒指如果「肥安」未能及时痊愈，就会由佢嘅儿子兼助教大衞领军出战欧联8强首回合作客车路士。

据悉安察洛堤最近1次接受检测，仍然发现确诊，皇马周二(5日)就会飞去伦敦备战欧联，「肥安」将於周三(6日)接受最後1次检测，如果痊愈，就会立即飞去伦敦同球队会合，希望亲自督师。

一旦安察洛堤无法起行，就会由「小安」大衞及皇马青训主管柏度莫合作领军，安察洛堤近年执教拿玻里同爱华顿，32岁嘅大衞都喺身边帮手，应该喺爸爸身上学到唔少嘢。

皇马上场西甲喺「肥安」缺席下，「小安」担大旗带队，凭宾施马射入2球12码，以2比1击败切尔达，但今场欧联对手系英超劲旅车路士，若然「肥安」未能亲自指挥大局，恐怕形势不妙。