马德里体育会季尾状态大勇，欧联8强大战曼城前录得6连胜，呢支西甲劲旅突然复苏，葡萄牙前锋祖奥菲历斯嘅爆发成为最大原因。祖奥菲历斯近8次为马体会上阵入7球，当中更有5球系喺开波头12分钟内攻入，堪称系「快枪手」！

马体会上场联赛4比1大破艾拉维斯，入2球嘅祖奥菲历斯喺11分钟先开纪录，佢近8场7个入波当中，有5球系开波12分钟内攻入！对奥沙辛拿同卡迪斯都系开波3分钟入球，对贝迪斯更加2分钟就开纪录，加上上一圈欧联对曼联7分钟入波，呢5个早早开纪录嘅入球，令马体会可以大踢顺境波。

阿根廷籍教头施蒙尼表示，祖奥菲历斯依家状态系佢出道以嚟最高峰：「菲历斯不断进步，依家系佢从未有过嘅巅峰状态，佢非常享受足球，亦做足晒我希望佢做到嘅嘢。」早前有传马体会打算夏季出售祖奥菲历斯，不过西班牙媒体指呢位葡萄牙球星依家踢出水准，已成马体会嘅非卖品。