周六（9日）晚曼联0比1不敌爱华顿，C朗整烂球迷电话一事继续发酵。据英国传媒报道，原来嗰位球迷系一位患有自闭症嘅14岁男童，仲要第一次入场睇波，竟然遭遇咁嘅对待，佢妈妈喺社交媒体上大呻「C朗袭击我个仔！」同时当地警方称已接获通知，将就事件展开调查，睇嚟C朗有排烦。

虽然C朗事後已经喺社交媒体上道歉，仲话想请番嗰位球迷睇波，但睇嚟暂时未能够阻止事件继续发展。据《利物浦回声报》报道，原来当时被C朗拍烂电话嘅球迷系一位患有自闭症同过度活跃嘅14岁男孩，佢妈妈Sarah Kelly喺社交媒体上控诉：「当时曼联球员步行返更衣室，我哋喺球员通道隔篱嘅看台，所以Jake（男孩名字）就去影佢哋。佢所有球员都有影，因为C朗嘅小腿流紧血，当时佢拉低只袜，我个仔影佢只脚，但一句声都冇出。点知C朗就好气冲冲咁一嘢打落我个仔只手同部电话度，然後就离去。」

据Sarah透露，当时Jake只手畀C朗打到瘀肿，而成部电话更加报销，「我好震惊！Jake都系，佢本身有自闭症，所以直到返屋企先消化到发生嘅事。佢对事件感到好不安，直情令佢以後唔想再入球场！」

默西赛德郡警方据悉已收到一位球员被指袭击一名男孩嘅消息，正联络曼联同爱华顿会方展开调查，睇嚟C朗喺呢件事上会有大把手尾跟。