周日(10日)凌晨英超，热刺凭孙兴民射入3球，作客以4比0大胜阿士东维拉，争逐英超前4之位占上风。孙兴民演出光芒四射，取得英超生涯第2次「帽子戏法」，追平C朗英超「戴帽」次数。值得一提，撇除12码入球数字，呢位南韩国脚更加系今季英超「纯射手王」，绝对系亚洲之光。

开波3分钟，热刺就打开纪录，哈利卡尼起脚省中人，反弹到孙兴民面前，佢第一时间补射入网。虽然热刺左闸马特杜靴迪之後伤出，但并冇影响球队表现，反而愈战愈勇，换边後冇几耐就由古路施夫斯基射成2比0。

热刺得势不饶人，哈利卡尼头槌二传畀孙兴民单刀射入，跟住古路施夫斯基右路横传，「老孙」再建一功，完成帽子戏法，协助热刺取得4连胜，领先第5位阿仙奴3分。虽然热刺踢多阿仙奴1场，但净得球多10球，争前4位占优势。

主角孙兴民今场踢出球王级水准，继2020年9月食出「大四喜」之後，再上演「帽子戏法」，强如C朗都只曾2次喺英超「戴帽」。

「老孙」今季英超17个入球之中，并冇12码，有20球进帐嘅射手榜一哥穆罕默德沙拿有5球来自12码，所以唔计12码，孙兴民以17球排「纯射手榜」第1位，比沙拿多2球。

另外，孙兴民2022年喺英超入9球，亦系众人之冠，本身系右脚球员嘅「老孙」喺英超有34球用左脚射入，成为赛事史上「右脚左射」入波第2多嘅球员，仅次於入39球嘅队友哈利卡尼，绝对系现时球坛最佳「双枪将」之一。