巴塞隆拿同法兰克福将於周五(15日)凌晨欧霸盃8强次回合交锋，法兰克福後衞杜达首回合被逐，今场需要停赛，预料38岁日本老将长谷部诚将会临危受命担任正选，同昔日老对手奥巴美扬大斗法。

长谷部诚2008年去德甲搵食，加盟禾夫斯堡，其後转投纽伦堡，2014年转投法兰克福之後一直效力至今。呢位可以胜任防守中场同中坚嘅全能战士年纪已大，今季上阵时间减少，德甲仅14次披甲，欧霸盃8强首回合主场对巴塞，佢并冇上阵。

不过，杜达次回合「坐波监」，长谷部诚终於有任务，就系要冻结巴塞射手奥巴美扬，两人以往曾於德甲有唔少碰头机会，同埋2019年11月欧霸盃分组赛，长谷部诚同当时效力阿仙奴嘅奥巴美扬又有2次交锋，虽然奥巴美扬2场都有波入，但阿仙奴同法兰克福各胜1仗。

长谷部诚认为虽然巴塞隆拿攻力强大，但双方首回合打和1比1，证明法兰克福防守稳阵，足以同对方周旋到底，次回合要令巴塞冇入波机会。