近年有唔少体坛名将，被赋予「GOAT」（史上最佳）嘅名号，作为足球界嘅天王级球星，美斯当然配得上呢个称号，而嚟紧下季佢仲会着住印有「GOAT」嘅战衣为巴黎圣日耳门出战。

事关美斯所效力嘅PSG，近日宣布同一间名叫「GOAT」嘅服饰转售平台公司达成合作协议，来季该品牌将会成为呢间法甲豪门球队战衣嘅赞助商之一。喺 PSG公布嘅宣传图上，见到「GOAT」嘅商标印喺球衣嘅手袖当眼位，而美斯当然有份出镜，有球迷就喺球会社交平台上留言，话成件衫简直就系为美斯度身订造。除咗出场球衣之外，PSG表示「GOAT」商标仲会出现喺训练同热身波衫上。

2015年创立嘅「GOAT」，系一个专为波鞋及潮流服饰而设嘅网上转售平台，畀用家买卖「心头好」之余，仲会帮手认证商品嘅真伪。PSG嘅赞助商经理Marc Armstrong，就认为今次合作，可以帮助球会巩固作为全球顶级体育品牌嘅地位，让球迷可以得到更加刺激同创新嘅体验。