周五(22日)凌晨西甲赛事，巴塞隆拿作客1比0小胜皇家苏斯达，进一步巩固前4欧联席位，不过佢哋拎呢3分都要付出沉重代价，朗奴阿拿奥祖、丹尼尔同碧基3大守将先後受伤离场，季尾冲刺後防人脚面临极大压力。

巴塞隆拿喺欧霸盃出局後，上场联赛亦输波，今仗作客皇家苏斯达决心十足，11分钟就由奥巴美扬头槌入波，皇家苏斯达之後反攻制造唔少威胁，但都未能攻破达史特根五指关，最终巴塞隆拿小胜1比0，目前以63分排联赛第2位，领先第5位嘅贝迪斯6分兼踢少1场，前4位置稳阵。

巴塞喺下半场有朗奴阿拿奥祖(膝头)、丹尼尔(足踝)同碧基(大腿)先後负伤离场，佐迪艾巴同加维亦带伤捱到完场，教练沙维赛後表示：「我唔满意球队表现，下半场一直捱打，球队依家非常疲惫，赛程亦都好难顶，呢个系现实，球员已经竭尽所能。」