曼联不敌阿仙奴之後，打入英超前4位参加下届欧联嘅机会，已经非常渺茫，意味如果C朗下季留队，将缺席欧联大舞台。曼联名宿奥云发表伟论，指欧联冇咗C朗，绝对系球坛一大损失，英超水平冠绝全球，英超球队亦喺欧联获得优秀成绩，应该获分配6个欧联席位先至啱，令C朗呢种球星可以参赛。

奥云担任球赛评述时话：「近几年经常出现欧联决赛由2支英超球队交锋，英超整体水平属於欧洲5大联赛第一，西甲亦强大，但系英超、西甲、意甲、德甲却同样有4个欧联席位，似乎唔多公平，英超争前4位非常激烈，无论阿仙奴、热刺或曼联任何一队无缘欧联，都系一种遗憾，特别系37岁嘅C朗喺英超累积入100球，如果佢下季冇份踢欧联，绝对系国际球坛嘅损失，如果英超有6个欧联名额，咁就最好。」

虽然奥云讲得好似几有道理，但相信欧洲足协短期内都唔会增加英超嘅欧联入场券。