普捷天奴虽然啱啱带领巴黎圣日耳门（PSG）夺得法甲冠军，不过依名阿根廷籍教练，似乎都系得唔到管理层信任，据报PSG目标之一嘅热刺领队干地今夏愿意接手，不过前题系球队需要满足佢两个条件。

据《法国RMC体育》报道，被PSG视为普捷天奴接班人嘅干地，已经表明自己今夏愿意接手，不过依支法甲豪门需要满足佢两个条件，包括3000万欧元年薪，以及喺转会上有100%话事权，据悉干地希望清洗嘅球员，包括巴西球星尼马。

52岁嘅干地同热刺合约2023年先到期，球队喺佢执教下表现大幅改善，目前仲有机会拎到来季欧联席位，不过由於佢同主席利维关系麻麻，所以希望提早离开，PSG同干地相信好快会进行正式谈判。